 |
| រូបភាព តំណាង |
ថ្ងៃច័ន្ទ, ១៥ សីហា ២០១៦
ដោយ មនសិការខ្មែរ
ក្រោយពេលព្រៃឡង់ត្រូវបានដាក់ចូលជាតំបន់ការពារនិងអភិរក្ស ហើយស្ថិតក្រោមការគ្រប់គ្រងរបស់ក្រសួងបរិស្ថានរួចមក គឺបទល្មើសកាប់ឈើនិងដឹកជញ្ជូនឈើខុសច្បាប់ ក៏ដូចជាបទល្មើសកាប់ព្រៃទន្ទ្រានយកដីធ្វើជាកម្មសិទ្ធិនៅតែបន្តកើតឡើងយ៉ាងអនាធិបតេយ្យដូចមុនដដែល។ ហេតុនេះហើយទើបប្រជាពលរដ្ឋក្នុងឃុំសណ្ដាន់ ស្រុកសណ្ដាន់ ខេត្តកំពង់ធំ ព្រួយបារម្ភយ៉ាងខ្លាំងចំពោះដីធ្លីដែលត្រូវធ្លាក់ទៅក្នុងកណ្ដាប់ដៃអ្នកមានលុយ អ្នកមានអំណាច ដោយសារតែមន្ត្រីជំនាញ និងមន្ត្រីអាជ្ញាធរ មិនចាត់វិធានការទប់ស្កាត់។ មន្ត្រីអាជ្ញាធរក្នុងឃុំសណ្ដាន់ ស្រុកសណ្ដាន់ ធ្លាប់ប្រាប់ប្រជាពលរដ្ឋថា ដីដែលពួកគាត់សុំកាន់កាប់នាពេលកន្លងមកនោះ ជាដីសម្បទានរបស់ក្រុមហ៊ុនយួនឈ្មោះស៊ីអស៊ីខេ ក៏ប៉ុន្តែជាក់ស្ដែងក្រុមមនុសមកពីតំបន់ផ្សេងបានទន្ទ្រានកាន់កាប់ដីក្នុងតំបន់នោះយកទៅដាំស្វាយចន្ទី និងដំណាំផ្សេងៗទៀតជាបន្តបន្ទាប់។
តំណាងប្រជាពលរដ្ឋក្នុងភូមិឈូក ឃុំសណ្ដាន់ បានឲ្យដឹងថា ដីដែលពួកគាត់ស្នើសុំកាន់កាប់នាពេលកន្លងមកនោះ មានទំហំប្រមាណ១០ហិកតានៅចំណុចព្រៃតាធឹក ប៉ុន្តែមន្ត្រីអាជ្ញាធរប្រាប់ពួកគាត់ថាជាដីសម្បទានសេដ្ឋកិច្ចសម្រាប់ដាំកៅស៊ូរបស់ក្រុមហ៊ុនយួនឈ្មោះស៊ីអស៊ីខេ(CRCK) ក៏ប៉ុន្តែកាលពីចុងខែកក្កដាកន្លងទៅថ្មីៗនេះ ស្រាប់តែមានមនុស្សមកពីតំបន់ផ្សេងប្រមាណ១៥គ្រួសារ ធ្វើសកម្មភាពទន្ទ្រានកាន់កាប់ដីនោះយ៉ាងគឃ្លើន ហើយមិនឃើញមន្ត្រីអាជ្ញាធរ និងមន្ត្រីជំនាញចាត់វិធានការទប់ស្កាត់ឡើយ។ ហេតុនេះហើយទើបប្រជាពលរដ្ឋក្នុងឃុំសណ្ដាន់ អំពាវនាវឲ្យលោក ឡង គីសឺង អភិបាលស្រុកសណ្ដាន់ បកស្រាយឲ្យបានច្បាស់លាស់ករណីមនុស្សពីតំបន់ផ្សេងទន្ទ្រានកាន់កាប់ដីព្រៃឡង់នៅចំណុចព្រៃតាធឹក ភូមិឈូក ឃុំសណ្ដាន់ ស្រុកសណ្ដាន់ ខេត្តកំពង់ធំ។
មន្ត្រីអង្គការក្រៅរដ្ឋាភិបាលបានឲ្យដឹងថាក្រុមហ៊ុនស៊ីអស៊ីខេរបស់យួន ទទួលបានដីសម្បទាននៅតំបន់ព្រៃឡង់ប្រមាណជាង៦០០០ហិកតាសម្រាប់ដាំកៅស៊ូកាលពីឆ្នាំ២០១០ ហើយក្រុមហ៊ុននេះបានបំពានកាប់ឈើក្រៅបរិវេណដីសម្បទាន ហើយដឹកជញ្ជូនធ្វើអាជីវកម្មខុសច្បាប់យ៉ាងគឃ្លើនដោយមានការឃុបឃិតជាមួយមន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធជាច្រើនស្ថាប័នទៀត។ ចំណែកលោក អ៊ុត សំអន អភិបាលខេត្តកំពង់ធំ បែរជាធ្វើមិនដឹងមិនឮអ្វីទាំងអស់ចំពោះបទល្មើសកាប់ឈើនិងទន្ទ្រានកាន់កាប់ដីរដ្ឋនៅក្នុងព្រៃឡង់នៃឃុំសណ្ដាន់ ស្រុកសណ្ដាន់ ខេត្តកំពង់ធំ។ ហេតុនេះហើយទើបមានពលរដ្ឋពីតំបន់ផ្សេងទៅទន្ទ្រានកាន់កាប់ដីធ្លីក្នុងភូមិឈូក ឃុំសណ្ដាន់ ដោយគ្មានញញើតអ្វីទាំងអស់ ក្នុងខណៈដែលលោក ឡង គីសឺង អភិបាលស្រុកសណ្ដាន់ គិតតែរឿងផលប្រយោជន៍ផ្ទាល់ខ្លួន។ បញ្ហានេះលោក សាយ សំអាល់ រដ្ឋមន្ត្រីក្រសួងបរិស្ថាន មិនត្រូវបណ្ដែតបណ្ដោយតទៅទៀតទេ ព្រោះព្រៃឡង់ក្នុងឃុំសណ្ដាន់ ស្រុកសណ្ដាន់ នៅតែប្រឈមនឹងការឈូសឆាយទន្ទ្រានបំផ្លាញយ៉ាងពេញបន្ទុកឥតឈប់ឈរ៕